Zbardhet lista e emrave te grupimit G 99 të Erion Veliajt
Lista e emrave të grupit nismëtar të lëvizjes politike të ish-drejtuesit të MJAFT-it. Çfarë ndodhi në mbledhjen e parë të këtij grupi, të mbajtur sekret dhe të zhvilluar më 27 dhjetor të vitit 2007
Shaban Sulçe
Albania
Ish-drejtuesi i MJAFT-it, Erion Veliaj, prej kohësh po lakohet se do të jetë kryetari i një partie apo një lëvizjeje të re politike. Madje, një gjë të tillë Veliaj nuk nguroi ta deklaronte edhe në intervistën e dhënë disa ditë më parë për gazetën “Albania”, por pa dhënë detaje të mëtejshme rreth emrave apo drejtuesve që do të përbënin këtë lëvizje. Pavarësisht këtij hezitimi, gazeta “Albania” ka mundur të sigurojë në mënyrë konfidenciale të dhëna që zbardhin emra, fakte dhe ide që zbulojnë formën dhe përmbajtjen e kësaj lëvizjeje. Një gjë e tillë është bërë e mundur falë burimeve të brendshme të kësaj lëvizjeje, të cilat kanë qenë prezente gjatë zhvillimit të mbledhjes së parë të grupit drejtues të quajtur G99, në ditët e fundit të vitit 2007. Mësohet se kjo lëvizje ka në përbërjen e saj rreth 80 anëtarë, ndërsa gazeta “Albania” zbardh sot emrat e 22 anëtarëve të parë të saj.
Mbledhja sekret
Ka qenë data 27 dhjetor e vitit të kaluar, kur drejtuesit e G-99 janë mbledhur për herë të parë dhe kanë diskutuar rreth pikënisjes, organizimit dhe ideve të kësaj lëvizjeje. Pjesëmarrës në këtë takim kanë qenë Erion Veliaj, Milva Ikonomi, Andrea Stefani, Mustafa Nano, Nora Malaj, Genci Majdeli, Lekë Sokoli, Enri Hide, Albana Fico, Selim Belortaja, Artur Kalanxhi, Daniel Borakaj, etj. Mbledhja është zhvilluar jashtë vëmendjes së publikut dhe medias dhe ka shërbyer si pikënisja e mbledhjeve të vazhdueshme të këtij grupi nismëtar. Gjatë vitit 2008, G99 ka zhvilluar edhe disa mbledhje të radhës, më e fundit ka qenë ajo e katër ditëve më parë. Kauza e përbashkët e shpallur në këtë mbledhje ka qenë: “S’kemi asgjë për të humbur, veç dinjitetin tonë që duhet të vëmë në vend”. Objektivi kryesor i kësaj lëvizjeje është deklaruar sigurimi i 10 vendeve në parlament në zgjedhjet e ardhshme elektorale në Shqipëri.
Idetë
Në diskutimet e pjesëmarrësve në mbledhjen e parë të G-99-s është folur me një mllef ndaj politikës së vjetër, ka patur një vetësiguri dhe vetëbesim ndaj suksesit, janë hedhur dhe diskutuar ide të ndryshme, megjithatë grupi drejtues i G99-s nuk ka patur ndonjë ide konkrete rreth organizimit strukturor të kësaj lëvizjeje. Anëtarët e grupit drejtues të G99-s më së shumti kanë folur për çështje filozofike dhe të përgjithshme, ku janë hasur fjali të tipit: “E vetmja vlerë e përbashkët është sulmi ndaj antivlerës”. “Asnjë prej nesh nuk mund të lejojë të jetojë në këtë realitet. Po shohim një paradë kllounësh që na tërheqin zvarrë dhe po na përdhunojnë vlerat dhe liritë”. “Ne jemi shpresa e fundit”, etj
|